Azərbaycan Prezidenti İlham Əliyev çərşənbə axşamı Birləşmiş Ərəb Əmirlikləri nümayəndə heyəti ilə görüş keçirib. Nümayəndə heyətinə ölkənin Xarici İşlər Naziri Səid Bin Mübarək Əl Haceri rəhbərlik edib.
Görüş Qəbələ şəhərində baş tutub və tərəflər arasında geniş spektrli məsələlər müzakirə olunub. Prezidentin mətbuat xidmətinin yaydığı məlumata görə, danışıqlarda siyasi, iqtisadi, ticarət və enerji sahələri ilə yanaşı, bərpa olunan enerji istiqamətində əməkdaşlıq imkanları da diqqət mərkəzində olub.
Tərəflər həmçinin birgə investisiya fondunun fəaliyyəti və hərbi sahədə əməkdaşlıq, o cümlədən birgə təlimlər məsələlərini də müzakirə ediblər. Görüşdə regional proseslərə də toxunularaq, Yaxın Şərqdə mövcud problemlərin diplomatik yollarla həllinin vacibliyi vurğulanıb.
Prezident İlham Əliyev iki ölkə arasında münasibətlərin strateji tərəfdaşlıq əsasında uğurla inkişaf etdiyini qeyd edib. O, BƏƏ nümayəndə heyətinin geniş tərkibdə Azərbaycana səfərinin əlaqələrin daha da dərinləşdirilməsi baxımından xüsusi əhəmiyyət daşıdığını bildirib.
Mənbə: AnadoluAgentliyi