Bugun.Tv xəbər verir ki, qu quşlarının köçünü izləmək üçün motorlu paraşütlə minlərlə kilometr uçan təbiət fəalı Saha Denç bu dəfə qurğuşun tərkibli ov sursatlarının yaratdığı təhlükəyə diqqət çəkib.
BBC-nin məlumatına görə, “İnsan qu quşu” kimi tanınan Saha Denç Arktik Rusiyadan Böyük Britaniyaya qədər təxminən 7 min kilometr məsafəni motorlu paraşütlə qət edərək Bewick qu quşlarının köçünü izləyib. Onun bu uçuşu quşların miqrasiya marşrutları və üzləşdikləri təhlükələr barədə məlumat toplamaq məqsədi daşıyıb.
Avstraliyada doğulan bioloq qurğuşun zəhərlənməsinin Avropada quşlar üçün ciddi təhlükə olduğunu bildirir. Onun sözlərinə görə, Böyük Britaniyada hər il 100 minə qədər su quşu bu səbəbdən tələf ola bilər. Avropa üzrə ümumi itkilərin isə bir milyona çata biləcəyi ehtimal edilir.
Denç qurğuşun sursatlarının satışını qadağan etməyə yönəlmiş yeni qaydaları dəstəkləyir. O, bu problemin miqyasının ictimaiyyət tərəfindən daha yaxşı dərk edilməsinin vacibliyini vurğulayır.
Mənbə: BBC News