Bugun.tv xəbər verir ki, İran İsveçin Avropa İttifaqının (Aİ) əməkdaşı Yohan Floderusun ölkədə saxlanıldığını təsdiqləyib.
İran dövlət televiziyasının məlumatına görə, Məhkəmə Hakimiyyətinin sözçüsü Məsud Setayeşi paytaxt Tehranda keçirdiyi mətbuat konfransında jurnalistlərin suallarını cavablandırıb.
“Bu İsveç vətəndaşı İran ərazisində törətdiyi cinayətlə bağlı ibtidai istintaqdan sonra məhkəmə qərarı ilə həbs edilib. Onun işi ilə bağlı prokurorluq tərəfindən aparılan hərtərəfli araşdırmanın nəticələri yaxın günlərdə səlahiyyətli məhkəməyə göndəriləcək”.
Setayeşi Aİ rəsmisinə qarşı ittihamlarla bağlı məlumat verməyib.
“The New York Times” qəzeti keçən həftə yazmışdı ki, Aİ Xarici Əlaqələr Xidmətində çalışan 33 yaşlı isveçli Yohan Floderus 2022-ci ilin aprelində turist kimi getdiyi İranda həbs edilib.
Bu xəbərdən sonra İsveç və Aİ rəsmiləri Floderusun İranda saxlanıldığını açıqlayıblar.