Bugun.tv xəbər verir ki, İran ABŞ ilə aparılacaq növbəti danışıqlar fonunda Hörmüz boğazından keçən ticarət gəmilərindən alınan ödənişləri 60 gün müddətinə dayandırmağa razılaşıb.
Fars agentliyinin məlumatına görə, Tehran bu müddət ərzində boğazdan təhlükəsiz keçidlə bağlı xidmətlərə görə hər hansı rüsum tələb etməyəcək. Bildirilir ki, 60 günlük möhlətdən sonra İran təhlükəsizlik, naviqasiya, ətraf mühitin qorunması və sığorta xidmətləri təqdim etməklə Hörmüz boğazından keçən gəmilərdən gəlir əldə etməyi planlaşdırır.
Mənbənin sözlərinə görə, qeyd olunan xidmətlər İran və Oman tərəfindən birgə təşkil olunacaq və əldə edilən vəsait ölkənin iqtisadi inkişafına yönəldiləcək.
Məlumata əsasən, vasitəçi qismində çıxış edən ABŞ, İran və Pakistan rəsmiləri Vaşinqton və Tehran arasında ilkin razılığın əldə olunduğunu təsdiqləyiblər. Sazişin iyunun 19-da Cenevrədə imzalanmasının gözlənildiyi bildirilir.
İran xarici işlər nazirinin müavini Kazem Qəribabadinin açıqlamasına görə, 60 günlük atəşkəs dövründə tərəflər İranın nüvə proqramı ilə bağlı müzakirələr aparacaq. Həmçinin ABŞ-ın İrana qarşı tətbiq etdiyi dəniz blokadası tədbirlərinin iyunun 15-dən etibarən dayandırılacağı və Livan da daxil olmaqla bütün cəbhələrdə hərbi əməliyyatların dərhal dayandırılmasının nəzərdə tutulduğu qeyd edilir.
Mənbə: TASS