Bugun.tv xəbər verir ki, İran Atom Enerjisi Təşkilatının rəhbəri Məhəmməd İslami ölkəsinin uranın zənginləşdirilməsi fəaliyyətindən geri çəkilməyəcəyini açıqlayıb.
İran ABŞ-ın nüvə proqramı ilə bağlı tələblərinə baxmayaraq, uranın zənginləşdirilməsini davam etdirmək mövqeyini qoruyur.
İranın Fars xəbər agentliyinin məlumatına görə, İslami Tehranda verdiyi açıqlamada ölkəsinin uranın zənginləşdirilməsindən imtina edib-etməyəcəyi ilə bağlı suala cavab verib.
“Qətiyyən yox. Zənginləşdirmə nüvə prosesinin ayrılmaz hissəsidir. Prosesin başlanğıc mərhələsinə sahib olmadan nüvə sənayesinə sahib olduğunuzu necə iddia edə bilərsiniz?” – İslami deyib.
“İran xalqının haqqıdır”
İslami nüvə sənayesini elm və texnologiyanın inkişafına təkan verən əsas sahələrdən biri kimi xarakterizə edib.
O, İranın elmi sahədə inkişaf etməsinin xalqın hüququ olduğunu və bu məsələdə geri addım atmayacaqlarını bildirib.
ABŞ vitse-prezidenti Ceyms Devid Vens isə bundan əvvəl İranın müharibəyə son qoymaq və ABŞ-ın tələblərini yerinə yetirmək üçün uranın zənginləşdirilməsi fəaliyyətini əhəmiyyətli dərəcədə azaltmalı olduğunu söyləmişdi.
İran zənginləşdirmə səviyyəsini 60 faizə çatdırmışdı
İran 2015-ci ildə imzalanan nüvə sazişi çərçivəsində uranın zənginləşdirilməsi səviyyəsini 3,69 faizlə məhdudlaşdırmışdı.
ABŞ 2018-ci ildə sazişdən birtərəfli qaydada çıxdıqdan və sanksiyaları yenidən tətbiq etdikdən sonra Tehran uranın zənginləşdirilməsi səviyyəsini 60 faizə yüksəltmişdi.
İranın xarici işlər naziri Abbas Əraqçi də ABŞ-la aparılan danışıqlar zamanı zənginləşdirmə fəaliyyətini azaltmağa hazır olduqlarını, lakin Vaşinqtonun “sıfır zənginləşdirmə” tələbini qəbul etməyəcəklərini bildirmişdi.
İranın əsas nüvə obyektlərinin zədələnməsindən sonra Tehranın uranın zənginləşdirilməsi fəaliyyətini yenidən başladıb-başlatmadığı isə hələlik təsdiqlənməyib.
Mənbə: Ensonhaber