Bugun.tv xəbər verir ki, İsrail ABŞ və İran arasında əldə olunan razılaşma ilə bağlı narazılığını ifadə edib.
Məlumata görə, İsrail tərəfi razılaşmanın Tehrana maliyyə vəsaitlərinin qaytarılmasını nəzərdə tutmasını tənqid edərək, bunun İran hakimiyyətinə təzyiq göstərmək əvəzinə mövqelərini gücləndirə biləcəyini bildirib.
Bildirilib ki, razılaşmada İranın zənginləşdirilmiş uran ehtiyatlarının gələcək taleyi ilə bağlı məsələlər də tam aydınlaşdırılmayıb. İsrail mənbələrinin fikrincə, Vaşinqton bu məsələdə İranın öhdəliklərinə əməl edəcəyinə ümid edir.
İsrail tərəfi həmçinin Tehranın bölgədəki silahlı qruplaşmalara, o cümlədən Livandakı Hizbullaha dəstəyinin dayandırılması məsələsinin də razılaşmada öz əksini tapmadığını vurğulayıb.
Məlumata əsasən, İsrailin Baş naziri Benyamin Netanyahu ABŞ Prezidenti Donald Trampla söhbəti zamanı ölkəsinin ABŞ-İran razılaşmasının Livanla bağlı hissəsinin iştirakçısı olmadığını bildirib.
İsrail mənbələrinin məlumatına görə, Netanyahu İsrail ordusunun Livandan çıxmayacağını, hazırkı mövqelərini qoruyacağını və Hizbullahdan qaynaqlanan təhdidlərə qarşı fəaliyyətini davam etdirəcəyini qeyd edib.
Mənbə: Mail.ru