Bugun.tv xəbər verir ki, İsrail və İran arasında bir müddət əvvəl əldə olunan atəşkəsin taleyi sual altına düşüb. Al Jazeeranin məlumatına görə, tərəflər yenidən qarşılıqlı hücumlar həyata keçirib, bu isə regionda genişmiqyaslı münaqişənin yenidən alovlanacağı ilə bağlı narahatlıqları artırıb.
Məlumata əsasən, İran tərəfindən İsrail istiqamətində raketlər buraxılıb. Eyni zamanda, Yəməndəki husi qüvvələri də İsrailə qarşı raket hücumu həyata keçirib. Buna cavab olaraq İsrail ordusu İran ərazisində hərbi hədəflərə zərbələr endirib. Tehran, İsfahan, Təbriz və digər şəhərlərdə partlayış səslərinin eşidildiyi bildirilib.
İran rəsmiləri İsrailin Livandakı əməliyyatlarını gərginliyin əsas səbəblərindən biri kimi göstərərək, hücumların davam edəcəyi təqdirdə daha sərt cavab veriləcəyini bəyan ediblər. Rəsmi Tehran həmçinin son hadisələrə görə ABŞ-ı da məsuliyyət daşımaqda ittiham edib.
ABŞ Prezidenti Donald Trump tərəfləri dərhal hərbi əməliyyatları dayandırmağa çağırıb. O bildirib ki, İsrail və İran arasında təcili atəşkəsin əldə olunması istiqamətində danışıqlar aparılır və yekun sülh razılaşması üçün diplomatik səylər davam etdirilir.
Ekspertlər hesab edirlər ki, son hadisələr Yaxın Şərqdə vəziyyətin hələ də son dərəcə kövrək olduğunu göstərir. Atəşkəsin pozulması regionda təhlükəsizlik risklərini artırmaqla yanaşı, enerji bazarlarına və beynəlxalq ticarət marşrutlarına da təsir göstərə bilər.
Mənbə: Al Jazeera