Bugun.tv xəbər verir ki, İsraildə dəniz suyunun şirinləşdirilməsi ilə məşğul olan beş əsas qurğunun fəaliyyətinin bir neçə gün dayanması ölkədə su təchizatı ilə bağlı problemlərə səbəb olub.
The Guardian yazır ki, Aralıq dənizində təxminən 100 kilometr uzunluğa çatan mikroyosun artımı qurğuların filtrlərini tıxayıb. İsrailin altı əsas duzsuzlaşdırma qurğusundan beşi bir müddət fəaliyyətini dayandırıb, daha sonra isə azaldılmış güclə işləməyə başlayıb.
Nəşrin məlumatına görə, bəzi alimlər və ekoloji təşkilatlar bu hadisənin Qəzzada kanalizasiya və çirkab sularının təmizlənməsi sistemlərinin ciddi şəkildə zədələnməsi ilə əlaqəli ola biləcəyini bildirirlər. Onların fikrincə, təmizlənməmiş çirkab suların dənizə axması suda azot və fosfor kimi maddələrin miqdarını artıraraq mikroyosunların sürətlə çoxalmasına şərait yarada bilər.
İsraildə su təminatının böyük hissəsində dəniz suyunun duzsuzlaşdırılması mühüm rol oynayır. Mütəxəssislər baş verən hadisənin ölkənin içməli su istehsalı infrastrukturu üçün əlavə risklər yaratdığını bildiriblər.
Qəzzada isə su və kanalizasiya böhranının daha ağır olduğu qeyd olunur. Guardian-ın məlumatına görə, bölgədə su və kanalizasiya infrastrukturunun böyük hissəsi zədələnib və bir çox insan içməli su üçün su maşınlarından asılı vəziyyətdədir.
Mənbə: The Guardian