İsraildə siyasi səhnədə mühüm dəyişikliklərə səbəb ola biləcək yeni ittifaqın qurulduğu bildirilir. Yerli media yazır ki, sabiq baş nazir Naftali Bennett ilə müxalifət lideri Yair Lapid qarşıdakı seçkilərə vahid blok şəklində qatılmaq barədə razılığa gəliblər.
Məlumata görə, Bennettin “Bennett 2026” partiyası ilə Lapidin rəhbərlik etdiyi “Gələcək Var” partiyasının birləşməsi ölkədə siyasi balansı dəyişə bilər və hazırkı baş nazir Benjamin Netanyahunun hakimiyyətdən kənarlaşdırılması ehtimalını artırır.
YENİ PARTİYA VƏ SEÇKİ PLANLARI
Channel 12 telekanalının məlumatına görə, “Birlikdə Partiyası” adlandırılan yeni siyasi platformanın əsas məqsədi 27 oktyabrda keçirilməsi planlaşdırılan seçkilərdə qələbə qazanmaqdır. Bildirilir ki, bu ittifaq daxili parçalanmanı aradan qaldıraraq daha geniş seçici bazasını cəlb etməyi hədəfləyir.
Maariv qəzetinin dərc etdiyi sorğu nəticələrinə əsasən, “Bennett 2026” partiyası parlamentdə azı 24 mandat qazana bilər ki, bu da Netanyahu liderliyindəki Likud partiyası ilə eyni səviyyə deməkdir. Lapidin partiyasının isə təxminən 7 mandat əldə edəcəyi proqnozlaşdırılır.
NETANYAHUSUZ HÖKUMƏT MÜMKÜNDÜR
Haaretz nəşri yazır ki, yeni ittifaq parlamentdə 61 mandatlıq çoxluq əldə edərsə, Netanyahu və ya ultra-ortodoks partiyalara ehtiyac olmadan hökumət qura bilər.
Ekspertlər qeyd edir ki, əsas çətinlik Bennettin sağ yönümlü elektoratını Lapid kimi daha sekulyar siyasətçi ilə ittifaqa inandırmaq olacaq.
MÜXALİFƏTDƏN DƏSTƏK, HÖKUMƏTDƏN TƏNQİD
Yeni ittifaq müxalifət nümayəndələri tərəfindən dəstəklənib. Sabiq müdafiə naziri Avigdor Lieberman bu addımı alqışlayaraq, əsas məqsədin mövcud hökuməti dəyişmək olduğunu bildirib.
Eyni zamanda, sabiq baş qərargah rəisi Gadi Eisenkot da bu qərarı “milli məsuliyyətli koalisiya” istiqamətində mühüm addım kimi qiymətləndirib.
Digər tərəfdən, hakimiyyət düşərgəsindən sərt reaksiyalar gəlib. Likud partiyası ittifaqı “seçiciləri aldatmaq cəhdi” adlandırıb. Milli təhlükəsizlik naziri Itamar Ben-Gvir və maliyyə naziri Bezalel Smotrich isə bu birləşməni tənqid edərək uğursuz olacağını iddia ediblər.
SİYASİ KEÇMİŞ
Qeyd edək ki, Bennett və Lapid 2021-ci ildə birgə koalisiya quraraq Netanyahu-nun uzunmüddətli hakimiyyətinə son qoymuşdular. Yeni ittifaqın da oxşar nəticə verib-verməyəcəyi qarşıdakı seçkilərdən sonra məlum olacaq.
Mənbə: TrtHaber