Bugun.tv xəbər verir ki, İsrailin Suriyanın paytaxtı Dəməşqdəki İran konsulluğunun binasına endirdiyi hava zərbəsi ilə iki ölkə arasında gərginlik artıb. Belə bir vaxtda baş nazir Binyamin Netanyahu ad çəkmədən Tehranı üstüörtülü hədələyib və “Kim bizə pislik etsə, biz də ona zərər verəcəyik”, – deyib.
İsrail baş nazirliyindən verilən yazılı açıqlamaya görə, baş nazir Netanyahu ölkədəki Tel Nof Hava Bazasını ziyarət edərək, İranın mümkün hücumu ilə bağlı qiymətləndirmələr aparıb.
Dəməşqdəki konsulluq binası hədəf alındıqdan sonra İranın İsrailə hücum ehtimalı müzakirə edilərkən, Netanyahu ölkəsinin müdafiə və hücum baxımından bütün təhlükəsizlik ehtiyaclarını qarşılayacaq vəziyyətdə olduğunu iddia edib.
İsrailin çətin bir dövrdən keçdiyini bildirən Netanyahu Qəzzada hücumları bütün sürəti ilə davam etdirdiklərini, digər tərəfdən də israilli məhbusların geri qaytarılması üçün mübarizə aparacaqlarını bildirib.