ABŞ-ın ən böyük səhiyyə və əczaçılıq şirkətlərindən biri olan Johnson & Johnson talk tərkibli uşaq pudrası və digər məhsullarının yumurtalıq xərçənginə səbəb olduğu iddiaları ilə bağlı on minlərlə məhkəmə işini həll etmək üçün 5,5 milyard dollarlıq razılaşma əldə etdiyini açıqlayıb.
Şirkətin məlumatına görə, razılaşma ABŞ-ın federal və ştat məhkəmələrində baxılan təxminən 76 min iddianı əhatə edir. Razılaşmanın qüvvəyə minməsi üçün qalan iddiaçıların azı 95 faizinin onu qəbul etməsi tələb olunur.
Johnson & Johnson bildirib ki, bu addım uzun illərdir davam edən hüquqi mübahisələrə son qoymaq məqsədi daşıyır. Bununla yanaşı, şirkət məhsullarının təhlükəsiz olduğunu, tərkibində asbest olmadığını və xərçəngə səbəb olması ilə bağlı iddiaları qəbul etmədiyini vurğulayıb.
Məhkəmə çəkişmələri on ildən artıqdır davam edir. Şirkət daha əvvəl bu iddiaları iflas proseduru vasitəsilə həll etməyə çalışsa da, məhkəmələr həmin cəhdləri rədd etmişdi. Son razılaşma qəbul olunarsa, ABŞ tarixində talk məhsulları ilə bağlı ən böyük hüquqi həllərdən biri olacaq.
Mənbə: The Guardian