Bugun.tv xəbər verir ki, Kanadanın Britaniya Kolumbiyası əyalətində yerləşən Villiston su anbarında ağaclarla birlikdə hərəkət edən qeyri-adi üzən “ada” aşkar edilib.
Hi-Tech Mailin məlumatına görə, obyekt ilk dəfə avqustun 13-də yerli balıqçı Roki Everi tərəfindən görüntülənib. İlk baxışda adaya bənzəsə də, mütəxəssislər bunun əslində torf, ağac kökləri və sahildə illər ərzində toplanmış bitki materialından yaranan böyük bir üzən təbəqə olduğunu bildirirlər.
Maraqlısı budur ki, üzərindəki ağaclar canlıdır və böyüməkdə davam edir. Peyk görüntülərinin araşdırılması göstərib ki, üzən obyekt ən azı iyulun 21-dən mövcud olub.
Mütəxəssislərin fikrincə, 2026-cı ildə su anbarının son 14 ildə ilk dəfə maksimum səviyyəyə çatması sahildə illər ərzində toplanmış materialı sudan ayıraraq hərəkətə gətirib.
Üzən təbəqənin su anbarındakı bənd üçün təhlükə yaratmadığı bildirilir. Lakin onun naviqasiya xəritələrində göstərilməməsi qayıq və balıqçılar üçün risk yarada bilər.
Yerli sakinlər isə bu qeyri-adi təbiət hadisəsinin necə yarandığını daha ətraflı öyrənmək üçün onun altına sualtı kamera yerləşdirməyi planlaşdırırlar.
Mənbə: Hi-Tech Mail