Rusiyanın xarici işlər naziri Sergey Lavrov Afrikanın zəngin təbii ehtiyatlara malik olmasına baxmayaraq, bu sərvətlərdən əldə olunan gəlirlərin qitə ölkələrinə deyil, əsasən Qərb dövlətlərinə yönəldiyini bildirib.
Lavrov bu fikirləri Moskva şəhərində Qvineya-Bisau xarici işlər naziri Fatoumata Jaou ilə keçirdiyi görüşdən sonra təşkil olunan birgə mətbuat konfransında səsləndirib.
Rusiyalı nazir qeyd edib ki, Afrika ölkələri ilə əməkdaşlığın genişləndirilməsi üçün böyük potensial mövcuddur və bu imkanlardan daha səmərəli istifadə edilməlidir.
Sergey Lavrovun sözlərinə görə, Afrikada müstəmləkəçilik dövrü formal olaraq başa çatsa da, onun iqtisadi və siyasi təsirləri hələ də davam edir. O bildirib ki, BMT Baş Assambleyasının müstəmləkə altında olan ölkələrə müstəqillik verilməsi ilə bağlı qəbul etdiyi bütün qərarlar tam şəkildə icra olunmayıb.
Nazir vurğulayıb ki, Afrika zəngin təbii resurslara sahib olsa da, bu xammalın ixracından əldə edilən əlavə gəlirlər qitə ölkələrinin iqtisadi inkişafına kifayət qədər töhfə vermir.
Lavrov, həmçinin, Afrika qitəsində mövcud problemlərin həllinin ilk növbədə Afrika ölkələrinin özləri tərəfindən həyata keçirilməsinin vacibliyini qeyd edib.
Mənbə: EnSonHaber