Siyasi ekspert Məhəmməd Əsədullazadə öz sosial media hesabında Yaxın Şərqdə baş verən geosiyasi proseslərlə bağlı şərh paylaşıb.
İranın qonşu ərəb ölkələri ilə münasibətləri son illərdə kəskin gərginlik fonunda inkişaf edir və Körfəz ölkələrinin mövqeyi “düşmənçilik xarakteri” daşıyır. O bildirib ki, BƏƏ, Küveyt, Səudiyyə Ərəbistanı, Bəhreyn və Qətərin ABŞ və İsrailin hərbi fəaliyyətlərinə regionda dəstək verməsi beynəlxalq hüquq və qonşuluq prinsiplərinə zidd addım kimi qiymətləndirilə bilər.
Ekspert qeyd edib ki, İranın Azərbaycana münasibətinin bəzən qeyri-konstruktiv olmasına baxmayaraq, rəsmi Bakı Tehranla diplomatik əlaqələri davam etdirib və qarşılıqlı etimad əsasında əməkdaşlığı qorumağa çalışıb. Onun fikrincə, Azərbaycan hətta bölgədə baş verən gərginliklər zamanı İrana humanitar dəstək də göstərib.
Əsədullazadə həmçinin vurğulayıb ki, region dövlətləri arasında münaqişələrin mövcudluğu tarixən dəyişkən xarakter daşıyır və gələcəkdə diplomatik normallaşma ehtimalı da istisna olunmamalıdır. O, bu kontekstdə Azərbaycan-Ermənistan münasibətlərini nümunə kimi göstərərək, keçmiş münaqişələrdən sonra sülh prosesinin mümkün olduğunu qeyd edib.