Bugun.tv xəbər verir ki, NASA-nın “Perseverance” aparatı Marsın Jezero kraterində suyun planetin qədim dövrlərindəki fəaliyyəti ilə bağlı yeni məlumatlar əldə edib.
ScienceDaily-nin NASA-nın Jet Propulsion Laboratory laboratoriyasına istinadən yaydığı məlumata görə, tədqiqatçılar Jezero kraterinin “Margin Unit” adlanan hissəsində süxurların su ilə ən azı üç ayrı mərhələdə qarşılıqlı əlaqədə olduğunu müəyyən ediblər.
Alimlər əvvəlcə bu ərazidə qədim Mars gölünün çöküntü süxurlarını tapacaqlarını gözləyirdilər. Lakin “Perseverance” burada vulkanik mənşəli süxurlara rast gəlib. Aparatın araşdırdığı nümunələr suyun müxtəlif dövrlərdə bu süxurların tərkibinə və quruluşuna təsir etdiyini göstərib.
Tədqiqatçılara görə, ilk mərhələlərdən biri yeraltı suların fəaliyyəti ilə bağlı olub. Daha sonra ərazidə vaxtilə mövcud olmuş qədim gölün suları süxurlara təsir edib. Üçüncü mərhələdə isə yerin altından hərəkət edən isti suların fəaliyyəti müşahidə olunub.
“Perseverance” süxurların tərkibini öyrənmək üçün “SuperCam” alətindən istifadə edib və “Margin Unit” ərazisində 185-dən çox süxur nümunəsini araşdırıb.
Nəticələr Marsın qədim iqlimi və planetdə həyat üçün mümkün şəraitin necə formalaşdığını anlamağa kömək edə bilər.
Mənbə: ScienceDaily