Bugun.TV xəbər verir ki, Fransanın şimalındakı Gravelines Atom Elektrik Stansiyasında meduzaların kütləvi şəkildə sahilə yaxınlaşması səbəbindən reaktorların fəaliyyəti dayandırılıb. Maraqlıdır ki, hadisə iki il ardıcıl olaraq eyni tarixdə baş verib.
Nature nəşrinə istinadən yayılan məlumata görə, reaktorların soyudulması üçün istifadə olunan dəniz suyunu çəkən nasos stansiyalarını çoxlu sayda meduza tutub. Nəticədə təhlükəsizlik məqsədilə stansiyada elektrik enerjisi istehsalına fasilə verilib.
Eyni hadisə 2025-ci il avqustun 11-də də baş vermişdi. Həmin vaxt meduzaların yaratdığı problem səbəbindən stansiyanın dörd enerji bloku dayandırılmışdı.
Stansiyanın operatoru EDF belə hadisələrin qarşısını almaq üçün yüz minlərlə avro xərcləsə də, problem 12 ay sonra yenidən təkrarlanıb.
Mütəxəssislər hadisənin mümkün səbəblərindən biri kimi iqlim dəyişikliyini göstərirlər. Dəniz suyunun temperaturunun yüksəlməsi planktonların artmasına, bu isə meduzaların qida ehtiyatının çoxalmasına və onların çoxalma dövrünün sürətlənməsinə səbəb ola bilər.
EDF stansiyanın ətrafında balıqçı qayıqları yerləşdirərək meduza kütlələrini uzaqlaşdırmağa çalışır. Şirkət stansiyanın yaxın günlərdə tam gücü ilə fəaliyyətə qayıdacağını açıqlayıb.
Təbiətin insan infrastrukturuna təsiri
Məqalədə təbiətin insan infrastrukturu üçün yaratdığı digər qeyri-adi problemlərə də diqqət çəkilir. ABŞ-ın Konnektikut ştatında elektrik transformatoruna girən yenotun mindən çox elektrik kəsintisinə səbəb olduğu və 2500-dən çox abonentin işıqsız qaldığı qeyd edilir.
Vaşinqtondakı LIGO qravitasiya dalğaları rəsədxanasında qarğaların soyutma borularını dimdikləməsi dəqiq ölçmələrdə məlumatların pozulmasına səbəb olub. CERN-də isə Böyük Adron Kollayderinin soyutma sisteminə düşən bir çörək parçasının elektrik enerjisinin kəsilməsinə səbəb olduğu bildirilir.
Mütəxəssislər bu kimi hadisələrin insan fəaliyyətinin təbiətə təsirinin və canlıların yaşayış mühitinin dəyişdirilməsinin gözlənilməz nəticələrindən biri olduğunu vurğulayırlar.
Mənbə: TRT Haber