Fransanın cənub və cənub-şərq bölgələrində davam edən güclü istilər və meşə yanğınları minlərlə hektar ərazini məhv edib. Baş verən yanğınlar səbəbindən 12 mindən çox sakin təhlükəsiz ərazilərə təxliyə olunub.
Bugun.tv xəbər verir ki, Pyrénées-Orientales departamentinin Trevillach ətrafında günlərdir davam edən yanğına 800-ə yaxın yanğınsöndürən, çoxsaylı xüsusi texnika və aviasiya vasitələri cəlb olunub. Rəsmi məlumata görə, indiyədək təxminən 4 min 900 hektar ərazi yanaraq külə dönüb və alov hələ də tam nəzarət altına alınmayıb.
Fransanın milli meteorologiya xidməti Météo-France ölkənin cənub-şərqində yerləşən yeddi departament üzrə ən yüksək – qırmızı təhlükə səviyyəsi elan edib. Bundan əlavə, 61 departament üçün narıncı isti hava xəbərdarlığı qüvvədədir. Sinoptiklərin proqnozuna əsasən, bəzi bölgələrdə havanın temperaturu 41 dərəcəyədək yüksələcək.
Yanğınlar elektrik və nəqliyyat infrastrukturuna da təsir göstərib. Bir sıra yaşayış məntəqələrində elektrik enerjisinin verilişində fasilələr yaranıb, SNCF isə təhlükəsizlik səbəbindən Pyrénées-Orientales bölgəsində bəzi qatar reyslərini müvəqqəti dayandırıb.
Fransanın Baş naziri Sebastyan Lekornu bildirib ki, bu ilin yanğın mövsümündə ölkə üzrə artıq 14 min 500 hektardan çox ərazi yanıb ki, bu da ötən ilin eyni dövrü ilə müqayisədə təxminən üç dəfə çoxdur.
Fransa Prezidenti Emmanuel Makron yanğınlardan zərər çəkən bölgələrin sakinlərinə dəstəyini ifadə edib. Avropa Komissiyasının Prezidenti Ursula fon der Lyayen isə Avropa İttifaqının Fransaya dəstək məqsədilə dörd yanğınsöndürmə təyyarəsi göndərəcəyini açıqlayıb.
Mənbə: EnSonHaber