Bugun.tv xəbər verir ki, Misirin Nil deltası bölgəsində aparılan tədqiqatlar zamanı təxminən 2600 il əvvələ aid olduğu ehtimal edilən böyük tikili kompleksinin qalıqları müəyyən olunub.
Alimlər peyk görüntüləri, maqnitometriya və digər geofiziki skan üsullarından istifadə edərək yerin altında iri ölçülü memarlıq quruluşlarının mövcudluğunu aşkar ediblər. Mütəxəssislərin fikrincə, tikili qədim Misirin Son Dövrünə aid məbəd kompleksinin və ya inzibati mərkəzin bir hissəsi ola bilər.
Araşdırmaçılar bildirirlər ki, ərazi uzun müddət Nil çayının gətirdiyi lil qatları altında qaldığından tikilinin izlərini adi qazıntılar vasitəsilə müəyyən etmək mümkün olmayıb. Müasir texnologiyaların tətbiqi sayəsində yeraltı divarların, otaqların və digər memarlıq elementlərinin konturları görünməyə başlayıb.
Alimlər yaxın aylarda ərazidə genişmiqyaslı arxeoloji qazıntılara başlanacağını və bunun qədim Misirin tarixi, dini həyatı və şəhərsalma ənənələri barədə yeni məlumatlar əldə etməyə imkan verəcəyini bildirirlər.
Mənbə: Daily Galaxy