Tariximizin müxtəlif dövrlərinə aid 300 mindən çox maddi-mədəniyyət nümunəsi var. Bu mirasın qorunması üçün muzeylərdə təhlükəsizlik tədbirləri hər zaman mütəmadi olaraq aparılır. Bəs muzey eksponatlarının sığortalanması və dəyən zərərlər necə ödənilir?
Muzeyləri bəzəyən hər bir eksponat tariximizin bir parçasıdır. Eksponatlar muzey ekspozisiyasına daxil olana qədər bir neçə mərhələdən keçir. Arxeoloji qazıntılar zamanı və ya nəsildən-nəslə ötürülən maddi nümunələrin çox vaxt bərpaya ehtiyacı olur. Muzey əşyalarının etibarlı qorunması tarixi-mədəni mirasın gələcək nəsillərə çatdırılması üçün olduqca vacibdir. Bu həm ziyarətçilərin eksponatlara vura biləcəyi hər hansı ziyanı, həm də yanğın və digər təhlükəsizlik məsələlərini əhatə edir.
Mədəniyyət Nazirliyinin Muzeylər və Daşınar mədəni irs sektorunun müdiri Altun Mikayıllı Bugun.tv–yə açıqlamasında bildirdi ki, mühafizə və təhlükəsizliyin təmin olunması hər zaman diqqət mərkəzində saxlanılır. Hər hansı eksponat təbii və ya insan faktoru nəticəsində zədə aldıqda ilk növbədə aktlaşdırılır. Sonra isə ekspert komissiyasi tərəfindən bu məsələyə baxılır. Muzeylərə məxsus hər bir eksponat sığortalanır və onların sığorta qiymətləri ekspertlər tərəfindən müəyyən edilir. Əlbəttə ki, ziyan kim tərəfindən dəyibsə, həmin qarşı tərəfdən də ödənilir. Bu zədənin dərəcəsindən asılı olur. Əgər bu bərpa olunası bir şeydirsə, bərpaçı konservatorlarımız tərəfindən bərpa olunur. Bu işlə məşğul olan çox yaxşı mütəxəssislərimiz var.
Muzeylərdəki eksponatların yanğından və təbii fəlakətlərdən qorunması üçün beynəlxalq treninqlər tərəfindən muzey rəhbərləri və işçiləri mütəmadi olaraq təlimatlandırılır. Zərər dəyən hər bir əşya bərpaçı rəssamlar tərəfindən bərpa edilir.
A.Mikayıllı deyir ki, istər təbii fəlakətlər, istər müharibə dövründə bizim əvvəlcədən təyin etdiyimiz proqrama uyğun olaraq, ilk növbədə eskponatlar seçilir, qablaşdırılır. Daşınması üçün müəyyən tədbirlər görülür.
Ölkəmizdəki muzeylərin daxilində bütün otaqlar müasir təhlükəsizlik kameraları ilə təmin olunub. Eksponatların böyük bir qismi xüsusi şüşə vitrinlərdə sərgilənir. Bu vitrinlər siqnalizasiya ilə təchiz edilməklə yanaşı, həm də zərbəyədavamlıdır.