Sosial şəbəkələrdə səhər yeməyi zamanı bir qədəh şampan içmək “gözəl həyat tərzi” simvolu kimi təqdim olunsa da, mütəxəssislər bunun sağlam vərdiş olmadığını bildirirlər.
Rusiyalı psixiatr-narkoloq, “AlkoSpas” klinikasının baş həkimi Marina Alekseyeva “Gazeta.Ru”-ya açıqlamasında bildirib ki, nadir hallarda istirahət zamanı bir qədəh şampan içmək özlüyündə asılılıq əlaməti deyil. Lakin alkoqolun günə yaxşı başlamaq üçün vacib elementə çevrilməsi təhlükəli siqnal ola bilər.
Mütəxəssisin sözlərinə görə, son illərdə sosial şəbəkələr alkoqollu içkiləri uğur, rahatlıq və estetik həyat tərzi ilə əlaqələndirən görüntüləri daha çox yayır. Bu isə insanların alkoqola münasibətini dəyişə və onu adi gündəlik ritual kimi göstərməyə başlaya bilər.
Alekseyeva vurğulayıb ki, əsas məsələ içkinin miqdarı deyil, insanın hansı səbəbdən alkoqola ehtiyac duymasıdır. Əgər içki yalnız xüsusi günlərdə istifadə olunursa, risk aşağıdır. Amma insan səhər özünü daha yaxşı hiss etmək, stressi azaltmaq və ya əhvalını dəyişmək üçün alkoqola müraciət edirsə, bu artıq narahatlıq doğuran vəziyyətdir.
Həkim bildirib ki, alkoqol asılılığı çox vaxt qəfil deyil, tədricən yaranır. Əvvəlcə içki bayramlarla, daha sonra həftəsonları, zamanla isə gündəlik həyatın bir hissəsinə çevrilə bilər.
Mütəxəssis insanlara özlərinə sual verməyi tövsiyə edib: “Alkoqolu niyə istəyirəm?” Əgər cavab sadəcə zövq və xüsusi hadisədirsə, vəziyyət fərqlidir. Lakin əhval-ruhiyyə yalnız içki ilə yaxşılaşırsa, buna diqqət yetirmək lazımdır.
Mənbə: Gazeta.Ru