ABŞ-ın NASA agentliyi mart ayına planlaşdırılan pilotlu Ay missiyasının startını təxirə salıb. Söhbət Artemis II missiyasından gedir.
Qurum rəhbəri Jared Isaacman sosial şəbəkə platforması X-də bildirib ki, mart ayındakı start pəncərəsi artıq nəzərdən keçirilməyəcək. O, qərarın texniki problemlərlə əlaqədar verildiyini və bunun məyusedici olduğunu qeyd edib.
Texniki nasazlıq səbəb olub
NASA daha əvvəl Space Launch System (SLS) daşıyıcı raketini və Orion kosmik gəmisini start meydançasından yenidən montaj korpusuna qaytarmaq qərarı verib.
Raket və kosmik gəmi yanvarın 17-dən Floridadakı start meydançasında yerləşirdi. Lakin fevralın 21-nə keçən gecə mütəxəssislər SLS raketinin kriogen mərhələsində helium təchizatında nasazlıq aşkarlayıblar. NASA rəhbərliyi problemin səbəbindən asılı olmayaraq, bütün texniki çatışmazlıqların yalnız montaj binasında aradan qaldırıla biləcəyini bildirib.
Missiyanın yeni mümkün start tarixi hələ açıqlanmayıb.
Artemis proqramı nədir?
NASA 2019-cu ildə Artemis proqramı çərçivəsində Ay proqramını elan edib. Proqram üç mərhələdən ibarətdir:
Artemis I – pilotsuz uçuş, Orion gəmisinin Ay ətrafında dövr edərək Yerə qayıtması (16 noyabr – 11 dekabr 2022-ci il tarixlərində uğurla icra olunub).
Artemis II – ekipajlı uçuşla Ay ətrafında dövrə vurulması.
Artemis III – astronavtların Ay səthinə enişi.
NASA uzunmüddətli perspektivdə Ayda davamlı insan mövcudluğu yaratmağı və gələcəkdə Mars missiyalarına hazırlıq aparmağı hədəfləyir.
Mənbə: mail.ru