Bugun.tv xəbər verir ki, ABŞ və İran arasında əldə olunduğu bildirilən razılaşmadan sonra neft və mayeləşdirilmiş təbii qaz (LNG) daşıyan tankerlər yenidən Hörmüz boğazı istiqamətində hərəkət etməyə başlayıb.
Məlumata görə, boğazın yenidən açılacağı gözləntiləri fonunda bir sıra gəmi sahibləri marşrutlarını dəyişərək Yaxın Şərqə qayıdırlar. Afrika istiqamətində üzən bəzi neft tankerlərinin Hind okeanında geri dönərək Birləşmiş Ərəb Əmirliklərinin Füceyrə limanına istiqamətləndiyi bildirilir.
“Bloomberg”in məlumatına əsasən, ABŞ və İran arasında hazırlanan və yaxın günlərdə imzalanacağı gözlənilən memorandum Hörmüz boğazında gəmiçiliyin bərpasını nəzərdə tutur. Dünya üzrə neft və LNG tədarükünün təxminən beşdə biri bu strateji dəniz marşrutu vasitəsilə həyata keçirilir.
Gəmi brokerləri bildirirlər ki, Oman dənizində boğazın yaxınlığında gözləyən boş supertanker sayı son günlərdə əhəmiyyətli dərəcədə artıb. Bu tankerlərin mövcudluğu neft ixracının qlobal bazarlara daha sürətli bərpası baxımından mühüm əhəmiyyət daşıyır.
Məlumata görə, İranla əlaqəli bəzi gəmilər də yenidən aktiv hərəkətə başlayıb. Körfəz bölgəsində gözləyən yük və LNG gəmilərinin bir hissəsi isə artıq yeni marşrutlar üzrə hərəkət edir.
Qətər də Hörmüz boğazının açılacağı təqdirdə LNG ixracını artırmağa hazırlaşır. Gəmi izləmə sistemlərinin məlumatları bir neçə boş LNG tankerinin yenidən Yaxın Şərq istiqamətinə qayıtdığını göstərir.
Mənbə: Bloomberg