Ermənistanın baş naziri Nikol Paşinyan Qarabağ məsələsi ilə bağlı diqqətçəkən açıqlama verib. O bildirib ki, Ermənistan artıq bu mövzunu bağlamaq niyyətindədir və sülhə nail olmağın yolu məhz bundan keçir.
Paşinyan rəhbərlik etdiyi “Mülki Müqavilə” Partiyasının seçkiöncəsi proqramını təqdim edərkən Azərbaycanla münasibətlərdə mövcud vəziyyəti dəyərləndirib.
Sülhün möhkəmləndirilməsi prioritetdir
Baş nazir qeyd edib ki, regionda sülhün davamlı olması üçün konkret mexanizmlər yaradılmalıdır. Onun sözlərinə görə, bu istiqamətdə proses artıq başlayıb və əsas hədəflərdən biri kimi irəli aparılır.
Paşinyan əlavə edib ki, Azərbaycanın əsas hissəsini Naxçıvanla birləşdirəcək “Beynəlxalq Sülh və Rifah üçün Tramp Marşrutu” (TRIPP) layihəsinin həyata keçirilməsi və sülh sazişinin imzalanaraq təsdiqlənməsi regionda sabitliyin möhkəmlənməsinə xidmət edəcək.
Əlaqələrin genişləndirilməsi planlaşdırılır
Ermənistan hökumət başçısı vurğulayıb ki, vətəndaş cəmiyyəti və biznes nümayəndələri arasında əlaqələrin genişləndirilməsi, ticarətin artırılması, siyasi, mədəni və humanitar dialoqun inkişafı sülh prosesinə müsbət təsir göstərə bilər. Onun sözlərinə görə, bu istiqamətdə addımlar təşviq olunacaq.
“Qarabağ məsələsini bağlayırıq”
Paşinyan keçmişlə bağlı müzakirələrin davam etdirilməsinin artıq məqsədəuyğun olmadığını deyib:
“Artıq kimin harada yaşadığı məsələsini qabartmayacağıq. Qarabağ məsələsini bağlayırıq. Yalnız bu yolla sülhə nail ola bilərik”.
Mənbə: EnsonHaber