Bugun.tv xəbər verir ki, insanın səs yazısını dinləyərkən öz səsini yad və fərqli hiss etməsinin elmi izahı var. Mütəxəssislərə görə, danışarkən insan öz səsini həm hava, həm də sümüklər vasitəsilə eşidir.
Səsin birinci yolu hava keçiriciliyidir. Danışarkən yaranan səs dalğaları ağızdan çıxaraq qulağa çatır. İkinci yol isə yalnız danışan şəxsdə baş verir. Səs tellərinin yaratdığı titrəyişlər kəllə sümükləri vasitəsilə daxili qulağa ötürülür. Buna sümük keçiriciliyi deyilir.
Bu proses səsin daha qalın və dolğun eşidilməsinə səbəb olur. Sümüklər əsasən aşağı tezlikləri gücləndirdiyi üçün insan danışarkən öz səsini daha dərin qəbul edir. Lakin mikrofon yalnız havadakı səs dalğalarını qeydə alır və sümük keçiriciliyini yazıya köçürə bilmir.
Elm adamları qeyd edirlər ki, buna görə səs yazısında insanın səsi adətən daha incə və yüksək tonlu eşidilir. Araşdırmalara əsasən, insanın öz səsinə dair illər ərzində formalaşmış daxili təsəvvürü də bu fərqin narahatlıq yaratmasına səbəb olur.
Lakin insan öz səs yazılarını mütəmadi dinlədikcə bu fərqə alışa və səsini daha təbii qəbul edə bilər.
Mənbə: Mail.ru Science