Bugun.tv xəbər verir ki, Ermənistanın baş naziri Nikol Paşinyan Azərbaycan və Türkiyə ilə dövlətlərarası əlaqələrin qurulması istiqamətində iş aparıldığını bildirib.
Paşinyan bu barədə Qırğızıstanın paytaxtı Bişkekdə keçirilən Şanxay Əməkdaşlıq Təşkilatının “ŞƏT+” formatında toplantısında çıxışı zamanı danışıb.
Ermənistan hökumətinin başçısı bildirib ki, İrəvan xarici siyasətdə balanslaşdırılmış və tarazlaşdırıcı yanaşma həyata keçirir. Onun sözlərinə görə, bu siyasətin əsas məqsədi Ermənistanın suverenliyini və müstəqilliyini qorumaq və möhkəmləndirməkdir.
Paşinyan qonşu ölkələrlə münasibətlərə də toxunaraq, İran və Gürcüstanla dostluq əlaqələrinin dərinləşdirildiyini, Azərbaycan və Türkiyə ilə isə dövlətlərarası münasibətlərin qurulması istiqamətində irəliləyiş olduğunu deyib.
Ermənistanın baş naziri Azərbaycanla əldə olunan sülh razılaşmasının bu prosesi daha konkret mərhələyə keçirdiyini bildirib. O qeyd edib ki, hazırda Azərbaycan və Türkiyə ilə dövlətlərarası əlaqə kanallarının açılması üzərində iş aparılır.
Paşinyan həmçinin ABŞ-ın dəstəyi ilə gündəmə gələn “Beynəlxalq Sülh və Rifah üçün Tramp Marşrutu” (TRIPP) layihəsindən danışıb. Onun sözlərinə görə, layihənin həyata keçirilməsi Şərqdən Qərbə, eləcə də Cənubdan Şimala yeni nəqliyyat imkanlarının yaranmasına şərait yarada bilər.
Paşinyan hesab edir ki, TRIPP-nin həyata keçirilməsindən bölgədəki bütün ölkələr iqtisadi və nəqliyyat baxımından fayda əldə edə bilər.
Mənbə: Ensonhaber