Bugun.tv xəbər verir ki, popkornun hazırlanması zamanı qarğıdalı dənəsinin birdən-birə partlayaraq ağ və yumşaq kütləyə çevrilməsi əslində fizikanın bir neçə qanununun eyni anda işləməsinin nəticəsidir.
Science Mail-ın məlumatına görə, popkorn üçün xüsusi qarğıdalı növündən istifadə olunur. Bu dənlərin xarici qabığı möhkəm və nəmə qarşı davamlı olur. Daxildə isə əsasən nişasta və müəyyən miqdarda su yerləşir.
Dənə qızdırıldıqda onun daxilindəki su buxara çevrilir. Möhkəm qabıq buxarın çıxmasına imkan vermədiyi üçün daxildə təzyiq sürətlə artır. Təxminən 175–180 dərəcə Selsidə təzyiq 9 atmosferə çata bilir. Bu zaman nişasta yumşalaraq su ilə birlikdə yapışqan kütləyə çevrilir.
Qabıq təzyiqə tab gətirmədikdə çatlayır və suyun sürətlə buxara çevrilməsi nişastalı kütləni çölə doğru itələyir. Nəticədə dənin həcmi təxminən 40–50 dəfə artır və popkorn yaranır.
Maraqlıdır ki, 2015-ci ildə aparılan araşdırma popkornun “partlama” səsinin qabığın qırıldığı anda deyil, bir qədər sonra yarandığını göstərib. Alimlər həmçinin müəyyən ediblər ki, partlayış zamanı çıxan buxar dənəni yuxarı itələyə və onun havada fırlanmasına səbəb ola bilər.
Popkorn üçün qarğıdalı dənəsində optimal su miqdarının təxminən 14 faiz olduğu bildirilir.
Mənbə: Science Mail