Rusiya Prezidenti Vladimir Putin Ermənistanın Baş naziri Nikol Paşinyanla telefon danışığı aparıb. Bugun.tv xəbər verir ki, bu barədə Kremlin mətbuat xidməti məlumat yayıb.
Bildirilib ki, telefon danışığı Ermənistan tərəfinin təşəbbüsü ilə baş tutub. Söhbət zamanı Ermənistanın Avropa İttifaqına üzvlük istiqamətində atdığı addımlar və Avrasiya İqtisadi İttifaqındakı (Aİİ) gələcək iştirakı əsas müzakirə mövzularından olub.
Kremlin məlumatına görə, Putin 2026-cı il mayın 30-da Astanada keçirilən Avrasiya İqtisadi İttifaqı sammitində Belarus, Qazaxıstan, Qırğızıstan və Rusiya liderlərinin qəbul etdiyi birgə bəyanata sadiqliyini təsdiqləyib. Rusiya tərəfi Ermənistanın mümkün qədər tez Avropa İttifaqına qoşulması və ya Aİİ-də qalması ilə bağlı ümumxalq referendumunun keçirilməsinin vacibliyini vurğulayıb.
Eyni zamanda, Ermənistan hökuməti telefon danışığında Paşinyanın Rusiyanın Ermənistan məhsullarına tətbiq etdiyi ticarət məhdudiyyətlərinin aradan qaldırılması üçün Putindən dəstək istədiyini açıqlayıb. Məlumata görə, bu məhdudiyyətlər meyvə-tərəvəz, balıq, gül və bəzi digər məhsulların ixracına təsir göstərir.
Son aylarda Ermənistanın Avropa İttifaqı ilə yaxınlaşması Moskva ilə İrəvan arasında münasibətlərdə gərginliyi artırıb. Buna baxmayaraq, Ermənistan tərəfi mövcud fikir ayrılıqlarının dialoq yolu ilə həllində maraqlı olduğunu bildirib.
Mənbə: mail.ru