Bugun.tv xəbər verir ki, Böyük Britaniyanın nüfuzlu “The Guardian” nəşri Rusiyada daxili narahatlığın artdığını və Prezident Vladimir Putinin mövqeyinin əvvəlki illərlə müqayisədə zəiflədiyini yazıb.
Nəşrin təhlilinə görə, Ukrayna müharibəsinin beşinci ilinə keçməsi fonunda Rusiyada iqtisadi problemlər, yüksək inflyasiya və sosial narazılıq dərinləşir. Məqalədə qeyd olunur ki, ölkədə internet məhdudiyyətləri və iqtisadi çətinliklər artıq gündəlik həyata ciddi təsir göstərir.
“The Guardian” yazır ki, bir vaxtlar Kremlə tam dəstək verən bəzi biznes dairələri və hakimiyyətə yaxın şəxslər də mövcud vəziyyətdən narahatdır. Nəşr hesab edir ki, Ukrayna müharibəsinin uzanması Rusiya daxilində siyasi gərginliyi artırır.
Məqalədə vurğulanır ki, Vladimir Putin hələ də hakimiyyətdə qalmaq üçün kifayət qədər siyasi imkanlara sahib olsa da, Kreml daxilində narazılıq riskinin artdığı hiss olunur. Analitiklər hesab edirlər ki, Putinə qarşı mümkün təhlükə kütləvi etirazlardan daha çox hakimiyyət daxilindən yarana bilər.
“The Guardian” həmçinin qeyd edir ki, Rusiya iqtisadiyyatında artım tempinin zəifləməsi və uzunmüddətli müharibə xərcləri hakimiyyət üçün əsas problemlərdən birinə çevrilib.
Mənbə: The Guardian