Qəzzadə şagirdlər ağır humanitar şəraitdə lisey məzuniyyət imtahanlarına hazırlaşmağa çalışırlar. Dünyanın bir çox ölkəsində şagirdlər imtahanlara məktəb və hazırlıq kurslarında rahat şəraitdə hazırlaşdığı halda, Qəzzədə gənclər elektrik, dərs vəsaiti və hətta kağız-qələm çatışmazlığı ilə üz-üzə qalıb.
Hücumları nəticəsində Qəzzədə məktəblərin 90 faizindən çoxu dağılıb. Zədələnmiş məktəblərin böyük hissəsi isə məcburi köçkün fələstinlilər üçün sığınacağa çevrilib.
Fələstin Mərkəzi Statistika Qurumunun 6 aprel tarixli hesabatına əsasən, 2025–2026 tədris ilində Qəzzədə 700 min şagird təhsil hüququndan məhrum olub, 39 min şagird isə lisey məzuniyyət imtahanlarında iştirak edə bilməyib.
Şagirdlər təxminən bir ay sonra keçiriləcək imtahanlara çadırlarda, elektriksiz və son dərəcə çətin şəraitdə hazırlaşırlar. Müharibə və yoxsulluq onların psixoloji vəziyyətinə ciddi təsir göstərsə də, gənclər təhsildən ayrılmamaq üçün mübarizəni davam etdirirlər.
Dəfələrlə məcburi köçkün düşən Məhəmməd Kaddum bildirib ki, hücumlar başlayanda liseyin birinci kursunda oxuyurdu və sonradan təhsildən uzaq düşüb. Onun sözlərinə görə, illərlə davam edən fasilədən sonra yenidən dərslərə qayıtmaq olduqca çətindir.
Kaddum qeyd edib ki, gündəlik həyat əsasən su tapmaq, odun toplamaq və ailənin ehtiyaclarını qarşılamaqla keçir. O, yalnız gün işığında 1-2 saat dərs oxuya bildiyini, gecələr isə elektrik olmadığı üçün fənərdən istifadə etdiklərini deyib.
Digər şagird Melek Musabbah da telefon və fənər işığında imtahana hazırlaşdığını bildirib. O deyib ki, kağız baha olduğu üçün bir müddət karton parçaları üzərində yazmağa məcbur olub.
Musabbahın sözlərinə görə, çadır şəraitində nə gündüz səs-küy, nə də gecə elektriksizlik səbəbindən normal şəkildə dərs oxumaq mümkündür. Buna baxmayaraq, o, gələcəkdə həkim olmaq arzusundan vaz keçmədiyini bildirib.
Mənbə: TrtHaber