Azərbaycanda kredit götürən və sonradan işsiz qalan vətəndaşların maliyyə yükünü azaltmaq məqsədilə yeni sığorta mexanizmi hazırlanır.
İqtisadçı, millət vəkili Vüqar Bayramov sosial şəbəkə hesabında bildirib ki, hazırlanan qaydalara əsasən kredit risklərinin sığortalanması sistemi tətbiq oluna bilər. Bu mexanizm təsdiqlənəcəyi təqdirdə, borcalan özündən asılı olmayan səbəblərdən işini itirdikdə və ya gəlir mənbəyini itirdiyi üçün krediti ödəyə bilmədikdə, müəyyən hallarda öhdəliyin sığorta şirkəti tərəfindən qarşılanması mümkün olacaq.
Deputat qeyd edib ki, hazırda borcalanların həyatı, ölümü və əmək qabiliyyətinin itirilməsi ilə bağlı sığorta mexanizmləri mövcuddur. Yeni qaydalar isə ilk dəfə olaraq vətəndaşların işsiz qalma riskinin də sığortalanmasını nəzərdə tutur.
Vüqar Bayramovun sözlərinə görə, bu yenilik həm vətəndaşların maliyyə təhlükəsizliyini gücləndirə, həm də bank sektorunda kredit risklərini azalda bilər. Bununla yanaşı, sığortanın tətbiqi kredit götürənlər üçün əlavə xərc yarada biləcəyindən, bankların faiz dərəcələrini müəyyən qədər azaltması həmin yükü kompensasiya edə bilər.
Deputat hesab edir ki, kredit risklərinin sığortalanması ilə bağlı yeni qaydaların qısa müddətdə təsdiqlənməsi həm bank sektoru, həm də borcalanlar üçün müsbət nəticələr verə bilər.