Bugun.tv xəbər verir ki, Çilidə yerləşən Vera C. Rubin Rəsədxanası kainatın tarixdə ən geniş müşahidə proqramlarından birinə start verib.
Rəsədxananın 10 il davam edəcək “Legacy Survey of Space and Time” layihəsi çərçivəsində səmanın hər bir hissəsi mütəmadi olaraq izlənəcək. Alimlər bu müddətdə təxminən 17 milyard ulduzu, 20 milyard qalaktikanı və milyonlarla dəyişən kosmik obyekti qeydə almağı planlaşdırırlar.
Layihə çərçivəsində dünyanın ən böyük rəqəmsal kameralarından biri istifadə olunur. Kamera hər 40 saniyədən bir 3200 meqapiksellik görüntü çəkərək astronomlara asteroidlər, supernovalar və kainatda baş verən digər dəyişiklikləri real vaxt rejimində izləməyə imkan verəcək.
Mütəxəssislər bildirirlər ki, bu proqram kainatın quruluşu, qaranlıq maddə və qaranlıq enerji ilə bağlı indiyədək cavabsız qalan bir çox sualın araşdırılmasına mühüm töhfə verəcək.
Mənbə: Reuters