Bugun.tv xəbər verir ki, beynəlxalq alimlər qrupu Qrenlandiyada buzlaqların sürətlə əriməsinin Atlantik okeanındakı cərəyanlara və qlobal iqlimə təsirini araşdırmaq üçün genişmiqyaslı elmi ekspedisiyaya başlayıb.
Reuters-in məlumatına görə, Böyük Britaniyanın “RSS David Attenborough” tədqiqat gəmisi ilə həyata keçirilən ekspedisiyada 80-ə yaxın alim və mütəxəssis iştirak edir. Beş-altı həftə davam edəcək araşdırmanın əsas məqsədi Qrenlandiyadan ərimə nəticəsində okeana axan şirin suyun Atlantik Meridional Dövriyyə Sisteminə (AMOC) mümkün təsirlərini öyrənməkdir.
Tədqiqat zamanı alimlər buzlaqların alt hissəsini xüsusi sualtı aparatlarla xəritələndirəcək, okean axınlarını və suyun temperaturunu ölçəcəklər. Toplanacaq məlumatların gələcəkdə iqlim dəyişikliklərinin daha dəqiq proqnozlaşdırılmasına və buzlaqların əriməsi ilə bağlı erkən xəbərdarlıq sistemlərinin hazırlanmasına kömək edəcəyi bildirilir.
Mütəxəssislər hesab edirlər ki, Qrenlandiyada buzlaqların sürətlə əriməsi Avropada hava şəraitinə, dəniz səviyyəsinin yüksəlməsinə və qlobal iqlim sisteminə ciddi təsir göstərə bilər.
Mənbə: Reuters