Bugun.tv xəbər verir ki, Rusiya tərəfindən Ukraynanın paytaxtı Kiyev və Xarkov şəhərlərinə gecə saatlarında pilotsuz uçuş aparatları və raketlərlə hücumlar həyata keçirilib.
Məlumata görə, hücumlar nəticəsində ümumilikdə 9 nəfər həyatını itirib, onlarla insan yaralanıb. Enerji infrastrukturuna dəyən zərər səbəbindən minlərlə abonent işıqsız qalıb.
Ən ağır itkilər Kiyevdə qeydə alınıb. Şəhərdə baş verən hücumlar nəticəsində 4 mülki şəxs həlak olub, azı 23 nəfər yaralanıb. Hücumlar səbəbindən 140 mindən çox sakinin elektrik enerjisiz qaldığı bildirilir.
Xarkov şəhərində isə hücum zamanı xilasetmə əməkdaşları hədəfə alınıb. Nəticədə 5 xilasedici həyatını itirib, daha 5 nəfər yaralanıb. Təhlükəsizlik riski səbəbindən axtarış-xilasetmə işlərinin çətin şəraitdə aparıldığı qeyd olunur.
Hücumlar zamanı Kiyevin tarixi və dini simvollarından biri olan, UNESCO-nun Dünya İrs Siyahısına daxil edilmiş Kiyev-Peçersk Lavrası ərazisində də yanğın baş verib. Tarixi abidəyə ziyan dəyməsi Ukraynada və beynəlxalq ictimaiyyətdə narahatlıq doğurub.
Ukraynanın Baş naziri Yuliya Sviridenko hücumları ölkə xalqına və tarixi irsinə qarşı yönəlmiş ağır zərbə kimi qiymətləndirib.
Ukraynanın xarici işlər naziri Andrii Sıbiha isə Kiyev-Peçersk Lavrasına dəyən zərəri mədəni irsə qarşı cinayət adlandıraraq beynəlxalq ictimaiyyəti məsələyə reaksiya verməyə çağırıb.
Mənbə: Ensonhaber