Bugun.tv xəbər verir ki, Rusiya Müdafiə Nazirliyi Ukraynanın paytaxtı Kiyev və Zaporojye şəhərində hərbi sənaye müəssisəsi və logistika mərkəzlərinə zərbələr endirdiklərini açıqlayıb.
Nazirliyin yaydığı açıqlamada Rusiya Silahlı Qüvvələrinin Ukraynadakı fəaliyyəti ilə bağlı məlumat verilib.
Bildirilib ki, Rusiya ordusu gecə saatlarında Ukraynanın hərbi müdafiə müəssisələrinə və logistika mərkəzlərinə hücum edib. Kiyevdə pilotsuz uçuş aparatlarının, robot texnikasının və radioelektron sistemlərin saxlanıldığı və paylandığı “Novaya Poçta” terminalının, eləcə də “Kiyev-3” logistika mərkəzinin vurulduğu qeyd olunub.
Açıqlamada həmçinin Zaporojye şəhərində hərbi texnika üçün zireh və zirehli jiletlər üçün lövhələr istehsal edən “Zaporojstal” zavodunun da hədəf alındığı bildirilib.
Rusiya Müdafiə Nazirliyinin məlumatına görə, hücum qurudan yüksək dəqiqlikli silahlardan istifadə edilməklə həyata keçirilib.
Qeyd edək ki, bunlar Rusiya Müdafiə Nazirliyinin açıqlamasında yer alan iddialardır. Hücumların nəticələri və dəymiş zərərin miqyası barədə Ukrayna tərəfinin mövqeyi bu məlumatda təqdim olunmayıb.
Mənbə: TRT Haber