Rusiyada son illərdə ənənəvi ailə dəyərlərinin qorunmasına yönəlmiş siyasət təhsil sahəsinə də təsir göstərir. Ölkənin məktəblərində ailə quruluşu, valideynlik, evlilik və mənalı həyatla bağlı dərs və tədbirlər keçirilməyə başlanıb.
Rusiya Prezidenti Vladimir Putin 2024-cü ili “Ailə İli” elan etdikdən sonra ölkədə ailə dəyərlərinin təşviqinə yönəlmiş çoxsaylı layihə və tədbirlər həyata keçirilib.
Bu layihələrdən biri də Rusiya Təhsil Nazirliyinin 2024-cü ildə başladığı “Ailə haqqında biliklər” (“Semyevedeniye”) proqramıdır. Nazirliyin məlumatına görə, proqramın 2026–2027-ci tədris ilindən etibarən ölkə üzrə icbari dərslərdənkənar fəaliyyət kimi genişləndirilməsi planlaşdırılır.
Həftədə bir dəfə 5–9-cu sinif şagirdləri üçün keçirilən məşğələlərdə ənənəvi ailə dəyərləri, evlilik, valideynlik və çoxuşaqlı ailə modeli kimi mövzular müzakirə olunur. Dərsləri sinif və tarix müəllimləri, eləcə də psixoloqlar aparır.
Layihənin əsas məqsədi uşaqlarda ailənin əhəmiyyəti barədə təsəvvür formalaşdırmaq, onları ailə həyatına hazırlamaq və ənənəvi dəyərlərin gələcək nəsillərə ötürülməsinə töhfə verməkdir.
Son illərdə demoqrafik problemlərlə üzləşən Rusiyada bu cür layihələrin həyata keçirilməsi ilə doğum səviyyəsinin artırılmasına da nail olunması hədəflənir.
Bundan başqa, Rusiyanın bəzi bölgələrində Rus Pravoslav Kilsəsinin təşəbbüsü ilə məktəblərdə ailə və mənəvi dəyərlərlə bağlı söhbətlər təşkil edilir. Tədris proqramının tərkibinə daxil olmayan bu tədbirlərə məktəb rəhbərliyinin dəvəti ilə din xadimləri də qatılır.
Belə görüşlərdə şagirdlərə evlilik, ailədaxili münasibətlər, mənəvi dəyərlər və mənalı həyat haqqında məlumat verilir.
Rusiyada ənənəvi ailə dəyərlərinin təhsil siyasətindəki rolu getdikcə artır. Ailə institutunun gücləndirilməsinə yönəlmiş bu cür yanaşmaların qarşıdakı illərdə təhsil sistemində daha geniş yer tutacağı gözlənilir.
Mənbə: kenthaber27