Bugun.tv xəbər verir ki, ABŞ Rusiyanın dondurulmuş dövlət aktivlərinin bir hissəsinin blokdan çıxarılmasını və Vaşinqtonun nəzarətində olacaq maliyyə strukturuna köçürülməsini Avropa ölkələrinə təklif edib. Təşəbbüsün məqsədinin Ukrayna müharibəsinin dayandırılması ilə bağlı danışıqların yenidən canlandırılması olduğu bildirilir.
“Financial Times” qəzetinin məlumatına görə, təklif oktyabrın 9-da Mayamidə keçirilən görüşdə müzakirə olunub. Görüşdə ABŞ Prezidenti Donald Trampın xüsusi nümayəndəsi Stiv Uitkoff və onun kürəkəni Cared Kuşner, eləcə də Ukrayna, Fransa, Almaniya, Böyük Britaniya, Avropa İttifaqı və NATO nümayəndələri iştirak ediblər.
Avropa tərəfi təklifə qarşı çıxıb
Nəşrin məlumatına əsasən, Avropa nümayəndələri ABŞ-nin təşəbbüsünü qəbul etməyiblər. Almaniya kansleri Fridrix Merz oktyabrın 15-də bildirib ki, Avropada dondurulmuş Rusiya aktivləri Avropa nəzarətində qalmalıdır.
Reuters-in məlumatına görə, Avropa İttifaqı Rusiyanın Ukraynaya qarşı genişmiqyaslı müharibəyə başlamasından sonra təxminən 210 milyard avro dəyərində Rusiya Mərkəzi Bankı aktivlərini dondurub. Bu vəsaitlərin böyük hissəsi Belçikada yerləşən “Euroclear” maliyyə depozitarında saxlanılır.
Məlumatlara görə, təklif hələ razılaşdırılmayıb. Reuters də ABŞ təşəbbüsü ilə bağlı ilkin məlumatı müstəqil şəkildə təsdiqləyə bilmədiyini bildirib.
Mənbələr: Financial Times