Bugun.tv xəbər verir ki, Rusiyanın Novorossiysk şəhərində fəaliyyət göstərən yanacaqdoldurma məntəqələrində benzinin tükəndiyi və yanacaq satışının dayandırıldığı bildirilib.
Novorossiysk Şəhər Administrasiyasının yaydığı məlumata görə, şəhərdəki yanacaqdoldurma məntəqələrində benzin ehtiyatı qalmayıb. Dizel yanacağı isə yalnız 8 məntəqədə məhdud miqdarda mövcuddur.
Açıqlamada qeyd olunub ki, hazırda nəqliyyat vasitələrinə yalnız yanacaq kartı vasitəsilə yanacaq verilir. Bu imkandan isə yalnız şirkətlərə məxsus avtomobillər istifadə edə bilir.
Məlumata görə, Ukraynanın pilotsuz uçuş aparatları ilə Rusiyadakı neft emalı zavodlarına həyata keçirdiyi hücumlar nəticəsində ölkədə bir sıra müəssisələr texniki baxım üçün fəaliyyətini dayandırıb. Bu səbəbdən Rusiya hökuməti yanacaq bazarında sabitliyi qorumaq məqsədilə vaxtaşırı yanacaq satışı və ixracına məhdudiyyətlər tətbiq edir.
Bundan başqa, Moskva və Sankt-Peterburq da daxil olmaqla Rusiyanın təxminən 40 regionunda yanacaq satışına müxtəlif məhdudiyyətlərin tətbiq olunduğu bildirilir.
Mənbə: Trt.haber