Bugun.tv xəbər verir ki, ölkənin Təhlükəsizlik Xidmətinin (SBU) rəhbəri Vasili Malyuk bildirib ki, ruslar partlayışların dayandırılmasını istəyirlərsə, Ukraynanın sularını və ərazilərini tərk etməlidirlər.
Rusiya gəmilərində və ya Krım körpüsündə baş verən hər hansı partlayışın düşmənə qarşı tamamilə məntiqli və təsirli addım olduğunu müdafiə edən Malyuk bu cür əməliyyatların Ukrayna ərazi sularında həyata keçirildiyini və bunun tamamilə qanuni olduğunu bildirib.
“Ona görə də ruslar partlayışların dayandırılmasını istəyirlərsə, bunun üçün onların yalnız bir yolu var. Ukrayna ərazi sularını və torpaqlarımızı tərk etməlidirlər. Və bunu nə qədər tez etsələr, onlar üçün bir o qədər yaxşıdır. Çünki biz düşməni bu müharibədə 100 faiz məğlub edəcəyik”, – deyə Malyuk bildirib.
Qeyd edək ki, Rusiya mətbuatı Novorossiysk Dəniz Xilasetmə Koordinasiya Mərkəzinin bəyanatına əsaslanaraq, ötən gecə Kerç boğazı yaxınlığında bir rus tankerinin Ukrayna qüvvələri tərəfindən pilotsuz dəniz vasitəsi ilə hücuma məruz qaldığını bildirib.