Bəzi peşələr var ki, onlar sadəcə əmək fəaliyyəti deyil, həm də mənəvi məsuliyyət, insanlara xidmət və xeyirxahlıq missiyasıdır. Həkimlik də məhz belə peşələrdəndir. Uzun illərdir insanların sağlamlığı keşiyində dayanan Tovuz rayonunda yerləşən “İnci” klinikasının həkim-terapevti Ələddin Quliyev və onun yolunu davam etdirən qızı, həkim-radioloq Qaraqız Əhmədova bu müqəddəs missiyanı birlikdə yaşadan nümunəvi ailələrdəndir.
Ələddin Quliyev uzun illərdir öz bilik və təcrübəsi ilə yüzlərlə insanın sağlamlığına qovuşmasına yardım edib. Xəstələrinə göstərdiyi diqqət, qayğı və peşəkarlıq onu həmkarları və pasiyentləri arasında böyük hörmət sahibi edib. Onun üçün həkimlik sadəcə xəstəliyi müalicə etmək deyil, insana ümid vermək, ona mənəvi dayaq olmaq deməkdir.
Bu gün atasının yolunu qürurla davam etdirən Qaraqız Əhmədova da səhiyyə sahəsində öz uğurları ilə seçilir. Radioloq kimi fəaliyyət göstərən gənc həkim müasir tibbin ən vacib sahələrindən birində çalışır. Dəqiq diaqnozun qoyulmasında və xəstəliklərin vaxtında aşkarlanmasında onun əməyinin xüsusi rolu var. O, atasının peşəsinə və həyat yoluna hər zaman böyük hörmətlə yanaşdığını, onun fəaliyyətindən ilham aldığını qeyd edir.
Ata və qızı birləşdirən ən böyük dəyər isə insanlara xidmət etmək arzusu və peşələrinə olan sevgiləridir. Onların hər ikisi yaxşı bilirlər ki, bəzən bir doğru diaqnoz, bir düzgün müalicə və bir xoş söz insan həyatını dəyişə bilir.
Bu gün Ələddin Quliyev və Qaraqız Əhmədova kimi həkimlər cəmiyyət üçün əsl nümunədirlər. Onların fəaliyyəti göstərir ki, peşəkarlıq, insanpərvərlik və fədakarlıq nəsildən-nəslə ötürülən ən qiymətli mirasdır.
Yüzlərlə xəstənin minnətdarlığında yaşayan bu ailənin timsalında bir daha əmin oluruq ki, həkimlik peşə deyil, insan həyatına ümid bəxş edən müqəddəs bir missiyadır.
“Bu gün TV Media Qurumu” olaraq 17 İyun Tibbi İşçilərinin peşə bayramı münasibəti ilə hər iki həkimi ürəkdən təbrik edir, fəaliyyətlərində uğurlar arzulayırıq!
