Almaniyada fəaliyyət göstərən Würzburg Universiteti (Julius-Maximilians-Universität Würzburg) tədqiqatçıları tərəfindən hazırlanmış yeni nanorobotlar elm dünyasında böyük maraq doğurub. İnsan saç telindən təxminən 50 dəfə daha kiçik olan bu cihazlar mikroskopik mühitdə bakteriyaları tutmaq və onları istənilən istiqamətə yönləndirmək qabiliyyətinə malikdir.
Tədqiqatçılar bildirir ki, bu mikrorobotlar maye mühitdə bioloji materialların birbaşa idarə olunmasına imkan verir. Aparılan sınaqlarda robotların bakteriyaları toplayaraq başqa nöqtələrə daşıya bildiyi uğurla nümayiş etdirilib.
Nanorobotların əsas xüsusiyyəti onların hərəkət mexanizmidir. Qurğular hərəkət üçün işığın – daha dəqiq desək, fotonların geri təpmə qüvvəsindən istifadə edir. Bu zəif, lakin davamlı təsir nəticəsində robotlar yüksək sürət və çeviklik əldə edir.
Bundan əlavə, alimlər işığın polarizasiyasını dəyişərək robotların istiqamətini dəqiq şəkildə idarə edə bilirlər. Bu isə cihazların kəskin manevrlər etməsinə və geniş sahələri skan etməsinə şərait yaradır.
Mütəxəssislər hesab edir ki, bu texnologiya mikroskopik dünyada “aktiv müdaxilə” dövrünün başlanğıcıdır. Gələcəkdə bu cür nanorobotların tibbdə, xüsusilə infeksiyaların araşdırılması, bakteriyaların idarə olunması və biotibbi tədqiqatlarda geniş tətbiq olunacağı gözlənilir.
Mənbə: EnSonHaber