Türkiyənin Burdur vilayətində yerləşən, ağ qumlu sahilləri və firuzəyi rəngi ilə tanınan Salda Gölü, eyni zamanda Mars planetinə bənzərliyi ilə də diqqət çəkir. Göl ətrafında yaradılan yeni elmi mərkəzin məqsədi müxtəlif tədbirlər vasitəsilə beynəlxalq elmi ictimaiyyətin diqqətini bu bölgəyə cəlb etməkdir.
Burdur Mehmet Akif Ersoy Universiteti tərəfindən Salda Gölündə yaradılan Elm, Təhsil və Təbiətin Mühafizəsi Tətbiq və Araşdırma Mərkəzinin yaxın aylarda istifadəyə verilməsi planlaşdırılır. Türkiyənin Ətraf Mühit, Şəhərsalma və İqlim Dəyişikliyi Nazirliyi yanında Təbii Sərvətlərin Mühafizəsi Baş İdarəsi tərəfindən dəstəklənən mərkəzdə göl və onun ətraf mühiti üzrə elmi araşdırmalar, biomüxtəlifliyin öyrənilməsi, təbiətin qorunması və ictimai maarifləndirmə istiqamətində fəaliyyətlər həyata keçiriləcək.
Türkiyənin ilk astronavtı Alper Gezeravcı Burdur Tələbə Texnologiya Festivalı çərçivəsində bölgəyə səfəri zamanı Salda Gölünü və yaradılan elmi mərkəzi ziyarət edib. O bildirib ki, Salda yalnız təbii gözəlliyi ilə deyil, həm də kosmik tədqiqatlar üçün böyük ilham mənbəyidir. Gezeravcı qeyd edib ki, bu ərazi beynəlxalq kosmik tədqiqatlar baxımından böyük maraq doğurur və gənclərin elmə marağının artırılması üçün mühüm rol oynayır.
Bölgədə keçiriləcək tədbirlərin elmi şüurun yüksəlməsinə töhfə verəcəyini vurğulayan Gezeravcı əlavə edib ki, Salda Gölü gələcəkdə yalnız turizm məkanı deyil, həm də elmi kəşflərin aparıldığı mühüm bir mərkəzə çevriləcək.
Salda Gölündə keçiriləcək “Salda Elm Günləri” tədbirinin koordinatoru, astronom Kadir Uluç isə bildirib ki, bu ərazi xüsusilə Mars araşdırmaları baxımından mühüm əhəmiyyət kəsb edir. Onun sözlərinə görə, göl təbii laboratoriya rolunu oynayır və başqa planetlərə getmədən onların xüsusiyyətlərini öyrənmək üçün nadir imkan yaradır.
İyun ayında keçirilməsi planlaşdırılan “Salda Elm Günləri” çərçivəsində “Saldadan Marsa həyatın izləri” adlı elmi seminar təşkil olunacaq. Tədbirlər zamanı həmçinin elmi festival keçiriləcək, tələbələr müxtəlif eksperimentlərdə iştirak edəcək, axşam saatlarında isə teleskoplarla səma müşahidələri aparılacaq. Beləliklə, biologiya, kimya və astronomiya sahələri bir araya gətiriləcək.
Salda Gölü Marsdakı Jezero kraterinə bənzər xüsusiyyətlərə malik olması səbəbilə NASA və digər beynəlxalq elmi qurumların da diqqətini cəlb edib. Bildirilir ki, NASA-nın Marsa göndərdiyi “Perseverance” aparatı ilə paralel olaraq Türkiyə alimləri də Salda Gölü və ətraf bölgələrdə tədqiqatlar apararaq bu sahəyə töhfə verirlər.
Mənbə: TrtHaber