Bugun.tv xəbər verir ki, Fransanın Orlean şəhəri yaxınlığındakı Amazon anbarının uzun müddətdir ki, siçovulların “işğal”ına məruz qaldığını göstərən görüntülər yayımlanıb. Fransanın BFMTV kanalının yaydığı kadrlarda şəhərin Saran rayonunda Amazon-un məhsullarının, o cümlədən ərzaq materiallarının saxlandığı anbarda qutuların arasında siçovulların qaçması müşahidə olunur.
Sözügedən anbarda çalışan şirkətin əməkdaşı xəstəliyə yoluxmaqdan qorxduqlarını və səlahiyyətlilərin vəziyyətlə o qədər də maraqlanmadığını bildirib.
İşçilərin bağlı olduğu həmkarlar ittifaqının nümayəndələrindən Jan Silver Gilon anbardakı siçanlardan xilas olmaq üçün görülən tədbirlərin qeyri-kafi olduğunu və daha təsirli həll yollarına ehtiyac olduğunu bildirib.
Amazon isə anbarda dəfələrlə zərərvericilərlə mübarizə qrupunun işlədiyini, siçanlarla təmasda olan bağlamaların müştərilərə göndərilmədiyini iddia edib.
Mənbə: BFM TV