Bugun.tv xəbər verir ki, Şimali Koreya hakimiyyəti ölkədə müşahidə olunan rekord isti hava şəraiti fonunda vətəndaşlara ənənəvi yeməklərlə sərinləmək və orqanizmi gücləndirmək barədə tövsiyələr verib. Dövlət mediası xüsusilə it ətindən hazırlanan şorbanı, həmçinin toyuq bulyonu, balıq sıyığı, qarpız və xiyar kimi məhsulları isti havaya qarşı faydalı hesab etdiyini bildirib.
Məlumata görə, Koreya yarımadasında davam edən güclü istilər zamanı Şimali Koreyada temperatur 36,7 dərəcəyə çataraq ölkədə indiyədək qeydə alınmış ən yüksək göstərici olub. Dövlət televiziyası və qəzetlər vətəndaşlara bol maye qəbul etməyi, günün ən isti saatlarında açıq havada az qalmağı və ənənəvi qidalarla qidalanmağı tövsiyə edir.
Reuters qeyd edir ki, it əti şorbası Koreyada yay aylarının ən isti günləri hesab edilən “Sambok” dövrü ilə əlaqələndirilən qədim ənənələrdən biridir. Lakin bu ənənə son illərdə xüsusilə Cənubi Koreyada sürətlə zəifləyib və ölkədə it əti sənayesinin qadağan olunması istiqamətində qanunlar qəbul edilib. Şimali Koreyada isə bu yemək hələ də sağlamlığı möhkəmləndirən qida kimi təqdim olunur.
Mənbə: Reuters