Rəqəmsal musiqi platforması Spotify istifadəçilərin platformadakı məzmunun mənşəyini daha aydın şəkildə müəyyən edə bilməsi üçün yeni sistem üzərində işləyir. BBC-nin məlumatına görə, şirkət “təsdiqlənmiş” işarə (checkmark) tətbiq edərək ifaçıların real insan olub-olmadığını göstərməyi planlaşdırır.
Yeni sistemə əsasən, müəyyən meyarlara cavab verən sənətçilərin adlarının yanında “Spotify tərəfindən təsdiqlənmiş” qeyd və yaşıl işarə görünəcək. Bu addım xüsusilə süni intellekt vasitəsilə yaradılan musiqi məzmununun artdığı bir dövrdə istifadəçilərin daha şəffaf seçim etməsinə imkan yaradacaq.
Platforma bildirib ki, təsdiqləmə prosesi zamanı sənətçilərin sosial media fəaliyyəti, dinləyicilərlə qarşılıqlı əlaqəsi, musiqi satışları və konsert fəaliyyətləri kimi amillər nəzərə alınacaq. Şirkətin açıqlamasına görə, aktiv şəkildə axtarılan sənətçilərin 99%-dən çoxunun bu sistemlə təsdiqlənməsi gözlənilir.
Eyni zamanda qeyd olunur ki, Spotify bu prosesdə musiqi mədəniyyəti və tarixə töhfə verən məzmunlara üstünlük verəcək. Yeni funksiyanın yaxın həftələrdə istifadəyə verilməsi planlaşdırılır.
Ekspertlər hesab edirlər ki, bu addım süni intellektlə yaradılan məzmunun sürətlə artdığı musiqi sənayesində şəffaflığın artırılması baxımından mühüm rol oynayacaq.
Mənbə: TrtHaber