Bugun.TV xəbər verir ki, uzunmüddətli stress insanın yalnız psixoloji vəziyyətinə deyil, həm də xarici görünüşünə ciddi təsir göstərir. Rusiyalı həkim və klinik psixoloq Ulyana Maxova bildirib ki, stress orqanizmdə qocalma prosesini sürətləndirən əsas amillərdən biridir.
Mütəxəssisin sözlərinə görə, stress zamanı orqanizmdə kortizol hormonu artır və bu hormon uzun müddət yüksək səviyyədə qaldıqda dərinin elastikliyinə mənfi təsir göstərir. Nəticədə kollagen və elastin parçalanır, dəridə qırışlar, sallanmalar və quruluq yaranır.
Həkim qeyd edib ki, xroniki stress orqanizmi “bərpa və inkişaf” rejimindən çıxarıb “yaşamaq və aşınmaq” rejiminə keçirir. Bu zaman əzələ kütləsi azalır, duruş dəyişir və üzdə yorğun ifadə yaranır.
Mütəxəssis dərini yaylı döşəyə bənzədərək bildirib ki, kollagen həmin yayların rolunu oynayır. Kortizol isə zamanla bu “yayları” zəiflədir və dəridə qırışların əmələ gəlməsinə səbəb olur.
Stress həmçinin dərinin qoruyucu baryerini zəiflədir. Bu səbəbdən dəri nəmi daha pis saxlayır, qızartı, qabıqlanma və həssaslıq artır. Bundan əlavə, xırda damarların spazmı nəticəsində dəriyə daha az oksigen və qida maddəsi çatır.
Həkim bildirib ki, insan kifayət qədər yatsa belə, stress səbəbindən üz yorğun görünə bilər. Eyni zamanda akne, ekzema, psoriaz və rozasea kimi dəri problemləri də güclənə bilər.
Ekspert əlavə edib ki, stress zamanı orqanizm bütün enerjisini təhlükəyə qarşı yönəltdiyi üçün yaraların, cızıqların və dəri zədələrinin sağalması da gecikir.
Mütəxəssislər stressin idarə olunmasının dəri sağlamlığını qorumaqda günəşdən qorunmaq və siqaretdən uzaq durmaq qədər vacib olduğunu vurğulayırlar.
Mənbə: mail.ru