Bugun.tv xəbər verir ki, süni intellektlə mətn yazan vasitələrin geniş yayılması ədəbiyyat aləmində əsərlərin kim tərəfindən yaradılması ilə bağlı mübahisələri artırıb. Etibarlılığı müzakirə mövzusu olan süni intellekt detektorlarının nəticələri bəzi yazıçıların əsassız ittihamlarla üzləşməsinə və mükafatlardan məhrum edilməsinə səbəb olur.
“TRT Haber”in məlumatına görə, son dövrlərdə nüfuzlu ədəbi mükafatlar qazanan bir sıra müəlliflərin əsərlərinin süni intellekt tərəfindən yazıldığı iddia edilib. Xüsusilə “Pangram” kimi mətn yoxlama proqramlarının yayılması ədəbi mühitdə insan yaradıcılığı ilə maşın tərəfindən yaradılan mətnləri fərqləndirmək məsələsini gündəmə gətirib.
Detektorların dəqiqliyi mübahisə doğurur
Bu proqramları hazırlayan şirkətlər insan yazısı ilə süni intellekt mətnlərini ayırd etməkdə uğurlu olduqlarını bildirsələr də, mütəxəssislər nəticələrin hər zaman etibarlı olmadığını vurğulayırlar. Araşdırmalara görə, xüsusilə ingilis dili ana dili olmayan müəlliflərin mətnləri və fərqli yazı üslubları yanlış qiymətləndirilə bilər.
Müəllifin iş prosesi və ilkin qaralamaları araşdırılmadan yalnız detektorun nəticəsinə əsaslanmaq onun nüfuzuna zərər vura bilər.
Yazıçılar əsərlərinin orijinallığını sübut etməli olurlar
Bu vəziyyət nəşriyyatları və ədəbi mükafat komitələrini daha ehtiyatlı davranmağa vadar edir. Bəzi yazıçılar əsərlərinin özləri tərəfindən yazıldığını göstərmək üçün ilkin qaralamalarını və yaradıcılıq prosesinə dair qeydlərini ictimaiyyətə təqdim etməli olurlar.
Mütəxəssislər xəbərdarlıq edirlər ki, yoxlama vasitələrinin nəticələrinə həddindən artıq güvənmək yaradıcılığa və yazıçılara olan etimadı zəiflədə bilər. Onların fikrincə, əsərlərin müəllifliyini qiymətləndirərkən texnoloji alətlərin nəticələri ilə yanaşı, digər sübutlar da nəzərə alınmalıdır.
Mənbə: TRT Haber