Bugun.tv xəbər verir ki, aparılan araşdırmalara görə, Avropada insanların süni intellektin gələcəkdə iş yerlərinə təsiri ilə bağlı ciddi narahatlıq keçirdiyi bildirilib.
Məlumata görə, bir çox Avropa ölkəsində çalışanlar süni intellekt texnologiyalarının gündəlik işi asanlaşdırdığını qəbul etsələr də, gələcəkdə milyonlarla insanın işsiz qala biləcəyindən ehtiyat edirlər. Araşdırmada xüsusilə ofis işləri, mühasibatlıq, çağrı mərkəzləri və informasiya texnologiyaları sahəsində çalışanların daha çox risk altında olduğu vurğulanır.
Ekspertlər bildirirlər ki, süni intellekt artıq yalnız məlumat toplamaq və analiz etmək deyil, mətn yazmaq, şəkil yaratmaq və mürəkkəb qərarlar vermək imkanına da malikdir. Bu isə bəzi peşələrin tamamilə dəyişməsinə səbəb ola bilər.
Bununla yanaşı, mütəxəssislər yeni texnologiyaların fərqli peşələrin yaranmasına da yol açacağını qeyd edirlər. Avropa ölkələri hazırda əmək bazarını gələcək dəyişikliklərə uyğunlaşdırmaq üçün yeni təhsil proqramları və rəqəmsal bacarıq layihələri hazırlayır.
Mənbə: Euronews