Bugun.tv xəbər verir ki, Səudiyyə Ərəbistanı İsrailin Livandakı hərbi əməliyyatlarından narahatlığını ABŞ administrasiyasına diplomatik kanallarla çatdıraraq etiraz notası təqdim edib.
Məlumata görə, İsrail Dövlət Televiziyası KAN-ın yaydığı xəbərdə Riyadın İsrailin Livandakı hərbi fəaliyyətini xaotik və plansız hesab etdiyi bildirilib. Səudiyyə rəsmilərinin fikrincə, İsrail rəhbərliyinin əməliyyatların idarə olunması ilə bağlı aydın strategiyası yoxdur.
Xəbərdə qeyd olunur ki, Səudiyyə Ərəbistanı İsrailin baş naziri Benyamin Netanyahunun Livandakı əməliyyatları genişləndirmək cəhdlərinin regionda yeni gərginlik yaratmaq və ABŞ ilə İran arasında formalaşmaqda olan mümkün anlaşmaya mane olmaq məqsədi daşıdığından şübhələnir.
Riyad administrasiyasının Livandakı daxili vəziyyətin nəzarətdən çıxmasından narahat olduğu, eyni zamanda son dövrlərdə Livan parlamentinin sədri Nəbih Berri ilə münasibətlərini gücləndirdiyi də iddia edilir.
Məlumata əsasən, Səudiyyə Ərəbistanı Livanda dövlət institutlarının gücləndirilməsini və Hizbullahın təsir imkanlarının zəiflədilməsini dəstəkləyir.
Qeyd edək ki, İsrail ordusu martın 2-dən etibarən Livana qarşı genişmiqyaslı hava hücumlarına başlayıb. Livan Səhiyyə Nazirliyinin son məlumatına görə, hücumlar nəticəsində 3 666 nəfər həyatını itirib.
ABŞ-ın vasitəçiliyi ilə İsrail və Livan arasında bir neçə dəfə atəşkəs razılaşması əldə olunsa da, İsrail ordusunun Livanın cənubunda hərbi əməliyyatları davam etdirdiyi bildirilir.
Mənbə: TrtHaber