Bugun.tv xəbər verir ki, ölkələrin təbiəti və biomüxtəlifliyi qorumaq üçün üzərinə götürdüyü beynəlxalq öhdəliklərin icrası gözlənilən səviyyədə deyil. Mütəxəssislər xəbərdarlıq edirlər ki, mövcud tədbirlər davam edərsə, dövlətlərin 2030-cu ilədək qarşıya qoyulan ekoloji hədəflərin əksəriyyətinə çatması çətin olacaq.
“The Guardian” nəşrinin oktyabrın 19-da yaydığı məlumata görə, 2022-ci ilin dekabrında Kanadanın Monreal şəhərində keçirilən BMT-nin biomüxtəliflik sammitində ölkələr təbiətin qorunması ilə bağlı mühüm razılaşma əldə ediblər. Sənəd planetin quru və dəniz ərazilərinin 30 faizinin mühafizəyə alınmasını, zədələnmiş ekosistemlərin təxminən üçdə birinin bərpasını və təbiətə zərər vuran subsidiyaların azaldılmasını nəzərdə tutur.
Lakin razılaşmanın qəbulundan dörd il keçməsinə baxmayaraq, bir çox ölkənin müəyyənləşdirilən hədəflərdən geri qaldığı bildirilir. Nəşrin məlumatına görə, Böyük Britaniya 2030-cu ilədək nəzərdə tutulan 23 hədəfdən yalnız üçünü yerinə yetirmək istiqamətində irəliləyir.
Problemlərdən biri təbiətin qorunmasına ayrılan maliyyənin yetərli olmamasıdır. Bundan əlavə, bəzi ölkələrdə ekoloji layihələrə dəstək azaldılır, çirklənmə və təbii yaşayış mühitlərinin məhv edilməsi ilə bağlı çətinliklər davam edir. Bu amillər nadir bitki və heyvan növlərinin qorunmasını çətinləşdirir.
Bununla belə, müəyyən müsbət nəticələr də var. “The Guardian” qeyd edir ki, bəzi ölkələr yeni qorunan ərazilər yaradır, yerli icmaların torpaqlarının mühafizəsini genişləndirir. Məsələn, Fransa Polineziyasında geniş dəniz parkları yaradılıb, Qazaxıstanda isə təbiətin bərpası və Xəzər pələnginin yenidən təbiətə qaytarılması istiqamətində işlər görülür.
Oktyabr ayında Ermənistanın İrəvan şəhərində keçirilən COP17 biomüxtəliflik sammitində ölkələrin bu öhdəlikləri necə yerinə yetirəcəyi əsas müzakirə mövzularından biridir. Mütəxəssislər hesab edirlər ki, beynəlxalq razılaşmaların real nəticə verməsi üçün maliyyə dəstəyi artırılmalı, dövlətlər konkret tədbirlər görməli və əldə olunan nəticələr şəffaf şəkildə qiymətləndirilməlidir.
Mənbə: The Guardian