Bugun.tv xəbər verir ki, bu barədə Avropa Parlamentinin deputatı Anna Kavazzini “Euronews”a açıqlamasında bildirib.
Onun sözlərinə görə, Avropa Komissiyasının Temu platformasına təhlükəli uşaq oyuncaqları səbəbindən 200 milyon avro cərimə tətbiq etməsindən sonra şirkət artıq sadəcə vədlərlə kifayətlənməməli, konkret addımlar nümayiş etdirməlidir.
Anna Kavazzini qeyd edib ki, Temu hazırda Avropa İttifaqının təhlükəsizlik və istehlakçı hüquqları qaydalarına uyğun fəaliyyət göstərdiyini sübut etməyə çalışır. Deputat hesab edir ki, Çin şirkəti qaydalara əməl etməyə “hazır görünür”, lakin bunun praktik nəticələri də görünməlidir.
O bildirib ki, məsələ yalnız təhlükəli məhsullarla məhdudlaşmır. Kavazzinin fikrincə, Çin platformalarının Avropa bazarında yaratdığı “ədalətsiz rəqabət” artıq struktur problemə çevrilib. Deputat əlavə edib ki, Avropa şirkətləri sərt qaydalara riayət etdiyi halda, bəzi xarici platformalar daha zəif nəzarət şəraitində fəaliyyət göstərir.
Qeyd edək ki, Avropa Komissiyası Temu platformasını təhlükəli məhsulların satışına görə cərimələyib və şirkətdən təhlükəsizlik standartlarını gücləndirməyi tələb edib.
Mənbə: Euronews